O Xeolodía invita a descubrir o súper volcán de Galicia, en maio en Monfero
MONFERO
Francisco Canosa e a Asociación de Amigos do Parque Xeolóxico do Cabo Ortegal promoven esta xornada divulgativa na provincia
23 mar 2024 . Actualizado a las 05:00 h.O Xeolodía deste ano na provincia da Coruña celebrarase en Monfero. En realidade, serán dúas xornadas, a fin de semana do 11 e o 12 de maio, como explica o promotor desta iniciativa, o doutor en Xeoloxía Francisco Canosa, que organiza da man da Asociacion de Amigos do Parque Xeolóxico do Cabo Ortegal.
O Xeolodía é unha iniciativa de divulgación, con excursións xeolóxicas de campo guiadas por xeólogos, gratuítas e abertas a todos os públicos. Cada ano faise un por provincia, por iniciativa da Sociedade Xeolóxica de España.
Canosa conducirá a excursión da provincia coruñesa, que indagará no Ollo de Sapo, un tipo de rocha, e «o súper volcán de Galicia», título da xornada. O prazo de inscrición abrirase o día 27 de abril e poderase formalizar ata o 4 de maio.